مکتوبات احمد (جلد چہارم) — Page 236
مکتوبات احمد ۲۳۶ جلد چهارم بِسْمِ اللَّهِ الرَّحْمَنِ الرَّحِيمِ مکتوب نمبر ۹۲ نَحْمَدُهُ وَنُصَلِّي محبی عزیزی اخویم ڈاکٹر خلیفہ رشید الدین صاحب سلمہ السلام علیکم ورحمۃ اللہ و برکاتہ آپ کا عنایت نامہ پہنچا۔ میرے نزدیک یہ تو ہرگز مناسب نہیں کہ لڑکی کو قبل از نکاح قادیان لاویں ۔ کیونکہ یہ رسم ہمارے خاندان کی نہیں ہے اور جاہلوں کو نکتہ چینی کے لئے موقعہ ملتا ہے ۔ جو ایسا موقعہ دینا شرعاً ممنوع ہے اور شریعت نے بعض رسوم شریفانہ کو جن میں شرک نہیں اور مصلحت ہے بحال رکھا ہے اور نیز اس میں لڑکیوں کی بے عزتی ہے اور یہ بھی مناسب نہیں کہ یہ نکاح لاہور میں ہو کیونکہ لاہور میں بہت شریر لوگ بھی ہیں اور آج کل لاہور میں طاعون شروع ہو گئی ہے۔ پس بہتر طریق یہ ہے کہ جس جگہ آپ اس وقت ہوں ٹھہر رہیں ۔ اسی جگہ لڑکا معہ چند مہمانوں کے آجائے گا اور یہ تجویز آپ کے لئے ضروری ہے کہ ایک خادمہ جیسا کہ اس ملک میں دستور ہے کہ ایک نائن لڑکی کے ساتھ آیا کرتی ہے طیار رکھیں ۔ لاہور سے منگوالیں یا اپنی جگہ سے جیسا کہ مناسب ہو ۔ ۳۱ را گست ۱۹۰۲ء والسلام خاکسار مرزا غلام احمد عفی عنہ