انوارالعلوم (جلد 23) — Page 237
انوار العلوم جلد 23 237 مسئله وحی و نبوت کے متعلق اسلامی نظریہ صرف اس لئے پیدا کیا ہے کہ وہ اپنے نفس کو مہذب بنائیں اور تقرب الہی حاصل کریں۔ اس لئے پیدا کہ وہ دوسری جگہ اس کی تشریح یوں فرمائی ہے کہ صِبْغَةَ اللَّهِ ۚ وَمَنْ أَحْسَنُ مِنَ اللَّهِ صِبْغَةً وَ نَحْنُ لَهُ عَبدُونَ - 1 یعنی اللہ تعالیٰ کے رنگ کو اختیار کرو اور اللہ تعالیٰ سے بہتر رنگ کون دے سکتا ہے۔ حدیث میں اس رنگ کی تشریح یوں آئی ہے خَلَقَ اللَّهُ آدَمَ عَلَى صُورَتِهِ 12 اللہ تعالیٰ نے آدم کو ایسی شکل میں پیدا کیا ہے کہ الہی صفات کو ظاہر کر سکے۔ بائبل میں ہے کہ ”خدا تعالیٰ نے آدم کو اپنی صورت پر پیدا کیا۔ 13 پھر اس مقصد کے پورا کرنے کا طریقہ بیان کرتا ہے کہ وَ إِذْ قَالَ رَبُّكَ لِلْمَلَكَةِ إِنِّي جَاعِلٌ فِي الْأَرْضِ خَلِيفَةً 14 اور یاد کرو جب کہ تمہارے رب نے ملائکہ سے کہا کہ میں دُنیا میں اپنی صفات کو ظاہر کرنے والا ایک وجود پیدا کرنا چاہتا ہوں۔ گویا وَمَا خَلَقْتُ الْجِنَّ وَالْإِنْسَ الا لِيَعْبُدُونِ میں جو غرض انسان کی پیدائش کی بتائی گئی تھی اس آیت میں اُس غرض کے پورا کرنے کا اعلان کیا گیا۔ پھر انسان کو اس غرض کے پورا کرنے کے لئے چننے کی وجہ یہ بتائی کہ إِنَّا عَرَضْنَا الْأَمَانَةَ عَلَى السَّمَاتِ وَالْأَرْضِ وَالْجِبَالِ فَأَبَيْنَ أَنْ يَحْمِلْنَهَا وَ اَشْفَقْنَ مِنْهَا وَحَمَلَهَا الْإِنْسَانُ إِنَّهُ كَانَ ظَلُومًا جَهُولًا 15 یعنی شریعت کا حامل انسان کے سوا اور کوئی وجود مخلوقات میں سے نہیں ہو سکتا۔ کیونکہ اُس کے اندر اپنے ارادہ سے اپنے نفس پر ظلم کرنے اور اُسے مجبور کر کے کام لینے اور عواقب کو بھلا کر کام کرنے کی طاقت رکھی گئی ہے۔ امانت کا لفظ جو اس جگہ آیا ہے اس کی تشریح ایک دوسری آیت سے ہوتی ہے۔ إِنَّ اللَّهَ يَأْمُرُكُمْ أَنْ تُؤَدُّوا الْأَمْنَتِ إِلَى أَهْلِهَا - 16 یعنی اللہ تعالیٰ تم کو حکم دیتا ہے کہ تم حکومت کی امانت اُن لوگوں کے سپر د کرو جو اس کے اہل ہیں۔ ایک اور آیت میں انسان کی اس طاقت کا اظہار ان الفاظ میں کیا گیا ہے إِنَّا هَدَيْنَهُ السَّبِيلَ إِنَّمَا شَاكِرًا وَ إِنَّمَا كَفُورًا 17 ہم نے انسان میں یہ مادہ پیدا کیا ہے کہ وہ چاہے تو شکر گزار بندہ بن جائے اور چاہے تو نا فرمان بن جائے۔ یعنی اس پر جبر نہیں کیا صرف اسے مقدرت بخشی ہے تا کہ وہ انعام کا مستحق بنے