نومبر ١٩٠٢ء میں بٹالوی اور چکڑالوی کے مابین مباحثہ ہوا۔ مولوی عبداللہ صاحب چکڑالہ ضلع میانوالی کے رہنے والے تھے اپنے آپ کو اہل قرآن کہتے تھے اور حجّیت حدیث کے منکر تھے۔ ان کے مد مقابل مولوی محمد حسین بٹالوی حدیث کو قرآن پر بھی قاضی ٹھہراتے تھے گویا چکڑالوی صاحب نے احادیث کے بارے میں تفریط کا اور مولوی بٹالوی صاحب نے افراط کا راستہ اختیار کیا تھا۔ حضرت مسیح موعود علیہ الصلاۃ والسلام نے ان کے مباحثہ پر محاکمہ کرتے ہوئے اس رسالہ میں تحریر فرمایا:

’مسلمانوں کے ہاتھ میں اسلامی ہدایتوں پر قائم ہونے کے لیے تین چیزیں ہیں۔

(۱) قران شریف جو کتاب اللہ ہے۔۔۔

(۲) دوسری سنت۔۔۔سنّت سے مراد ہماری صرف آنحضرت صلی اللہ علیہ وسلم کی فعلی روش ہے جو اپنے اندر تواتر رکھتی ہے اور ابتداء سے قرآن شریف کے ساتھ ہی ظاہر ہوئی.۔۔۔

(۳) تیسرا ذریعہ ہدایت کا حدیث ہے اور حدیث سے مراد ہماری وہ آثار ہیں کہ جو قصّوں کے رنگ میں آنحضرت صلی اللہ علیہ وسلم سے قریبا ڈھیر سو برس کے بعد مختلف راویوں کے ذریعوں سے جمع کیے گئے۔۔۔

پس مذہب اسلم یہی ہے کہ نہ تو اس زمانہ کے اہلحدیث کی طرح حدیثوں کی نسبت یہ اعتقاد رکھا جائے کہ قرآن پر وہ مقدّم ہیں۔۔۔ اور نہ حدیثوں کو مولوی عبداللہ چکڑالوی کے عقیدہ کی طرح محض لغو اور باطل ٹھہرایا جائے بلکہ چاہیے کہ قرآن اور سنّت کو حدیثوں پر قاضی سمجھا جائے اور جو حدیث قرآن اور سنّت کے مخالف نہ ہوں اس کو بسر و چشم قبول کیا جاوے یہی صراطِ مستقیم ہے۔‘