تحریک جدید ۔ ایک الٰہی تحریک (جلد ہفتم۔ 1985 تا 1987) — Page 253
تحریک جدید- ایک الہی تحریک خطبہ جمعہ فرمودہ 25 اکتوبر 1985ء جماعتوں کو اب توجہ بھی پیدا ہورہی ہے تحریک جدید کے چندہ کی طرف۔اس سے پہلے کیونکہ چندہ عام اور وصیت اور بعض دیگر چندے تحریک جدید کے چندے کے مقابل پر بہت زیادہ آگے بڑھ گئے تھے، اس لئے تحریک جدید کے چندے کو یہ سمجھا جانے لگا تھا کہ اب یہ زوائد میں سے ہے۔حالانکہ عملاً یہ بات نہیں ہے۔یہ جتنے چندے بڑھے ہیں، یہ سب تحریک جدید کے چندے کے بچے ہیں۔تحریک جدید کے چندے نہ ہوتے، ان غریب قادیان والوں نے اور ہندوستان کی جماعتوں نے بکریاں بیچ بیچ کر اور کپڑے بیچ بیچ کر اور روپیہ، دوروپے اکٹھے کر کے مہینوں میں اگر نہ دیئے ہوتے تو آج کروڑوں تک بجٹ پہنچ نہیں سکتا تھا۔اس لئے جو اصل ہے، اس کی حفاظت ضروری ہے، اس کو قائم رکھنا ضروری ہے۔جتنے چندے یورپ اور امریکہ اور افریقہ اور دیگر جماعتوں میں اس وقت آپ کو نظر آرہے ہیں، یہ سارے تحریک جدید کے ان چندوں کی برکتیں ہیں، جو آغاز میں دیئے گئے تھے اور بڑی خاص دعاؤں کے ساتھ دیئے گئے تھے۔حضرت مسیح موعود علیہ السلام کے صحابہ بھی شامل تھے، اول درجے کے تابعین شامل تھے، مہاجرین الی اللہ شامل تھے، جو افغانستان سے یا دیگر جگہوں سے وہاں آکر بس گئے تھے۔ایک عجیب ماحول تھا اس وقت تقویٰ اور نیکی کا۔جس رنگ میں وہاں چندے دیئے جاتے تھے، وہ ایک ایسا منظر ہے کہ شاذ و نادر کے طور پر تاریخ میں اس قسم کے مناظر آیا کرتے ہیں۔کئی کئی مہینوں کی تنخواہیں انجمن کے غریب کارکن دے دیا کرتے تھے۔آج بھی یہ مناظر پھیل رہے ہیں ساری دنیا میں۔بڑے حسین نقوش ظاہر ہو رہے ہیں احمدیت کی برکت سے۔لیکن ان کا آغاز وہیں سے شروع ہوا ہے، قادیان سے۔اس کو بھلانا نہیں چاہئے۔اور تحریک جدید نے جو کر دار ادا کیا ہے اس عظیم الشان مالی قربانی کی رغبت پیدا کرنے میں اسے ہم کسی صورت میں بھی نظر انداز نہیں کر سکتے۔بہر حال اب جو شکل ہے، وہ یہ ہے کہ تحریک جدید کا چندہ تو ایک کروڑ ، اکیس لاکھ یا اس سے کچھ زائد ہوگا۔لیکن بجٹ تیرہ کروڑ سے زائد ہو چکا ہے۔اور تحریک جدید گویا کہ قریباً تیرھواں حصہ یا کچھ زائد اس سے پوری جماعت کے اخراجات میں حصہ لینے کی توفیق مل رہی ہے۔لیکن جیسا کہ میں نے بیان کیا ہے، یہ سارے فیوض تحریک جدید کے چندے کے ہی فیوض ہیں اور اس کو ضرور آگے بڑھانا چاہئے۔مجھے ذاتی طور پر علم ہے کہ ہزار ہا احمدی بچے بڑے ہو کر اس لئے مالی قربانیوں میں شامل ہوئے کہ بچپن میں ان کی ماؤں نے ان کو تحریک جدید کے نظام میں شامل کر دیا تھا۔یہ بہت ہی دیر پا اثرات ہیں، جو تحریک جدید کے چندوں کے ظاہر ہوئے۔آج جو نسلیں قربانیوں میں آگے بڑھ رہی ہیں، ان میں ایک 253