تفسیر کبیر (جلد ۱۳) — Page 42
اور ان میں سے چھ کے اپنڈکس اپریشن کے ذریعہ کاٹ دیئے اور چھ کے رہنے دیئے۔اس کے بعد اس نے تمام بندروں کی یکساں پرورش شروع کر دی اور یہ غور کرنا شروع کیا کہ آیا دونوں میں کسی قسم کا کوئی فرق پیدا ہوتاہے یا نہیں۔کچھ عرصہ کے بعد اس نے دیکھا کہ جن بندرو ں کے اپنڈکس کاٹ دئیے گئے تھے ان کی قوتِ مقاومت کم ہو گئی ہے۔وہ بیماریوں کا جلد شکار ہو جاتے ہیں اور غذا ان کے جسم کو لگتی نہیں۔لیکن دوسرے بندر جن کا اپریشن نہیں کیا گیا تھا وہ اسی طرح مضبوط رہے ہیں جس طرح پہلے تھے۔(The Text Book of Human Anatomy, 2nd Edition P387) اس سے ثابت ہو گیا کہ اپنڈکس جس کے متعلق خیال کیا جاتا تھا کہ شائد اس کا کوئی فائدہ نہیں۔یہ ایک زائد آنت ہے جو جسم انسانی میں پیدا ہو گئی ہے اس کا بھی انسانی جسم کی صحت کے ساتھ گہرا تعلق ہے۔اور جن لوگوں کی یہ آنت کاٹ دی جائے ان کی قوتِ مقاومت کم ہو جاتی ہے۔مگر اس سے یہ نہیں سمجھنا چاہیے کہ یہ قوتِ مقاومت دوسروں کے مقابلہ میں کم ہو جاتی ہے بلکہ قوتِ مقاومت کے کم ہونے کے یہ معنے ہیں کہ جتنی طاقت اس آنت کی موجودگی میں اس کے اندر پائی جاتی ہو اپریشن کے بعد اتنی طاقت اس کے اندر نہیں رہتی۔ورنہ ہو سکتا ہے کہ ایک شخص کا اپریشن نہ ہوا ہو اور کسی اور وجہ سے اس کے اندر مقابلہ کی طاقت کم ہو اس صورت میں اس کا اور اپریشن والے شخص کا مقابلہ نہیں ہو گا بلکہ دیکھا یہ جائے گا کہ اس شخص کے اندر پہلے کتنی طاقت مقابلہ تھی اور اب کتنی طاقتِ مقابلہ رہ گئی ہے۔اس موازنہ سے معلوم ہوتا ہے کہ اپریشن سے پہلے انسان کے اندر جتنی تابِ مقاومت ہوتی ہے اپریشن کے بعد اتنی طاقت اس میں نہیں رہتی بلکہ ضرور اس میں کمی آجاتی ہے۔فرانس کے اس ڈاکٹر نے جو تجربہ کیا اس سے ظاہر ہوتا ہے کہ اپنڈکس کا انسان کی قوتِ مقاومت اور اس کی صحت کی بحالی کے ساتھ گہرا تعلق ہے۔ممکن ہے آئندہ چل کر اس سے بھی زیادہ واضح طور پر اس کے فوائد ثابت ہو جائیں لیکن بہرحال اس وقت تک کی تحقیق یہی ثابت کر رہی ہے کہ اللہ تعالیٰ نے کسی چیز کو بے فائدہ پیدا نہیں کیا۔دوسری چیز جسے بےکار سمجھا جاتا تھا کان کی لَو ہے۔مگر اب معلوم ہوا ہے کہ یہ بھی بےکار نہیں بلکہ آواز کے سننے میں یہ ایک لطیف قسم کا اثر رکھتی ہے جس طرح بچے پتنگ کے ساتھ ایک چھوٹی سی دھجی یا پتلا سا کاغذ باندھ دیتے ہیں جو بظاہر زائد چیز نظر آتی ہے مگر پتنگ کے اڑانے میں وہ بہت کام آتی ہے۔اسی طرح کان کی لَو علاوہ اس کے کہ کان کو خوبصورت بنادیتی ہے آواز کے ساتھ بھی گہرا تعلق رکھتی ہے۔بعض حصے جسم انسانی میں ایسے ہیں جو اللہ تعالیٰ نے خوبصورتی کے لئے پیدا کئے ہیں انہی میں سے ایک کان کی لَو بھی ہے۔اگر کسی کے کان کی لَو کاٹ دی جائے تو بالکل بُچّا سا نظر آنے لگ جائے گا۔اور اس کی ساری خوبصورتی ماری جائے گی لیکن علاوہ خوبصورتی کے اس کا تو ایک بہت بڑا