حقائق الفرقان (جلد ۱) — Page 4
اور باریک در باریک حقائق و معارف اور اسرار کلامِ ربّانی اس پر کھولے جاویں گے۔غرض یہ ہمارا مجرّب اور آزمودہ طریقہ ہے پس جس کو قرآن سے محبّت اور علومِ قرآن سیکھنے کی پیاس اور سچّی تڑپ ہو وہ اِس پر کار بند ہو کر دیکھ لے۔(الحکم ۷؍اکتوبر ۱۹۱۳ء صفحہ ۶) یاد رکھو کہ قرآن شریف پڑھو اِس لئے کہ اس پر عمل ہو۔ایسی صورت میں اگر تم قرآن شریف کھول کر اس کا عام ترجمہ پڑھتے جاؤ اور شروع سے اخیر تک دیکھتے جاؤ کہ تم کِس گروہ میں ہو۔کیا منعَم علیہم ہو یا مغضوب ہو یا ضالّین ہو اور کیا بننا چاہیئے۔منعَم علیہم بننے کے لئے سچّی خواہش اپنے اندر پیدا کرو پھر اس کے لئے دعائیں کرو۔جو طریق اﷲ تعالیٰ نے انعامِ الہٰی کے حصول کے رکھے ہیں ان پر چلو اور محض خدا تعالیٰ کی رضا حاصل کرنے کے واسطے چلو۔اِس طریق پر اگر صرف سُورۃ فاتحہ ہی کو پڑھ لو تو مَیں یقینا کہتا ہوں کہ قرآن شریف کے نزول کی حقیقت کو تم نے سمجھ لیا اور پھر قرآن شریف کے مطالب و معانی پر تمہیں اطلاع دینا اور اس کے حقائق و معارف سے بہرہ ور کرنا یہ اﷲ تعالیٰ کا کام ہے اور یہ ایک صورت ہے مجاہدہ صحیحہ کی۔(الحکم ۲۴؍اپریل ۱۹۰۴ء صفحہ ۱۲) قرآن کریم میں عظمتِ الہٰی کا ذکر زیادہ ہَے احکام کے متعلق تو اڑھائی سَو کے قریب آیات ہیں مگر عظمتِ الہٰی کے بیان سے کوئی رکوع خالی نہیں۔اِس کی وجہ یہ ہے کہ جب انسان کے دل میں اﷲ کی عظمت بیٹھ جائے تو دولت و اَسباب و دیگر سامانِ دُنیا کی پرواہ جو احکامِ الہٰی کی بجا آوری میں مانع ہو سکتے ہیں مُطلق نہیں رہتی اور خود بخود انسان اپنے مَولیٰ کا فرمانبردار بن جاتا ہے۔(تشحیذالاذہان جلد ۶ نمبر۹ صفحہ ۳۵۳) قرآنِ مجید کے مقابلہ میں انجیل متی کی انجیل کا پہلا صفحہ اُٹھا کر دیکھو وہاں کیا لکھا ہے نسب نامہ یُسوع مسیح ، داؤد اور ابراہیم کے بیٹے کا۔ابراہام سے اِسحاق پیدا ہؤا اور اسحاق سے یعقوب پیدا ہؤا… متان سے یعقوب پیدا ہؤا اور یعقوب سے یوسف پیدا ہؤا جو مریم کا شوہر تھا جس کے پیٹ سے یُسوع جو مسیح کہلاتا ہے پَیدا ہؤا۔