مکتوبات احمد (جلد چہارم) — Page 169
حضرت اقدس مسیح موعود علیہ السلام کا جواب مکتوب بِسْمِ اللّٰہِ الرَّحْمٰنِ الرَّحِیْمِ حامداً و مصلیاً محبی اخویم مولوی رحیم بخش صاحب سلمہُاللہ تعالیٰ السلام علیکم ورحمۃ اللہ و برکاتہ آپ کا عنایت نامہ پہنچا جس قدر آپ نے کوشش کی ہے خدا تعالیٰ آپ کو اس کا اجر بخشے۔درحقیقت علماء کو اپنے شائع کردہ اقوال اور عقائد سے رجوع کرنا مشکل ہے ورنہ یہ مسائل ایسے صاف ہیں کہ ان کا سمجھنا کچھ مشکل نہیں ہے۔آپ اسی طرح کوشش جاری رکھیں اور ہر ایک نیک طبع انسان کو یہ مسائل سنادیا کریں۔جو لوگ قرآن شریف کی کچھ پرواہ نہیں کرتے ان کا سمجھانا مشکل ہے ورنہ بات تو بہت سہل ہے۔میں درد نقرس سے بیمار ہوں چلنے کی طاقت بھی نہیں، بہ نسبت سابق کچھ آرام ہے مگر طاقت رفتار نہیں، باقی سب طرح سے خیریت ہے۔بخدمت اخویم سید عبدالستار شاہ صاحب السلام علیکم و رحمۃ اللہ و برکاتہ برسد۔٭ ۳۰ ؍جون ۱۹۰۶ء الراقم مرزا غلام احمد ٭ بدر نمبر ۳۳ جلد ۶مورخہ ۱۵؍اگست ۱۹۰۷ء صفحہ ۱۱