مکتوبات احمد (جلد دوم) — Page 583
مکتوب نمبر ۱۸۸ پوسٹ کارڈ بِسْمِ اللّٰہِ الرَّحْمٰنِ الرَّحِیْمِ نَحْمَدُہٗ وَنُصَلِّیْ عَلٰی رَسُوْلِہِ الْکَرِیْمِ مکرمی اخویم۔السلام علیکم ورحمۃ اللہ وبرکاتہ آج یہ عاجز بخیروعافیت دہلی میں پہنچ گیاہے۔ظاہراً معلوم ہوتا ہے کہ انشاء اللہ القدیر ایک ماہ تک اسی جگہ رہوں۔کوٹھی نواب لوہارو جو بلی ماراں والے بازار میں ہے رہنے کے لئے لے لی ہے۔آپ ضرور آتی دفعہ ملیں اور میں نہایت تاکید سے آپ کو سفارش کرتا ہوں کہ آپ شیخ عبدالحق کرانچی والے کی نوکری کی نسبت ضرور کوشش فرماویں کہ وہ میرے بہت مخلص ہیں۔زیادہ خیریت ہے۔والسلام ۲۹؍ ستمبر ۱۸۹۱ء خاکسار غلام احمد عفی عنہ دہلی۔بازار بلی ماراں کوٹھی نواب لوہارو مکتوب نمبر ۱۸۹ پوسٹ کارڈ بِسْمِ اللّٰہِ الرَّحْمٰنِ الرَّحِیْمِ نَحْمَدُہٗ وَنُصَلِّیْ عَلٰی رَسُوْلِہِ الْکَرِیْمِ مکرمی اخویم۔السلام علیکم ورحمۃ اللہ وبرکاتہ اس عاجز کی تیاری کی ابھی کوئی پختہ خبر نہیں۔ابھی بحث کے لئے تیاری ہو رہی ہے۔شاید مولوی حکیم نور دین صاحب اور ایک جماعت ۱۷؍ اکتوبر ۱۸۹۱ء تک میرے پاس پہنچ جاوے۔میں جانے کے وقت آپ کو اطلاع دوں گا۔والسلام خاکسار غلام احمد از دہلی نوٹ: یہ مباحثہ دہلی کے ایام کی خط وکتابت ہے۔جب کہ سید نذیر حسین صاحب محدّث دہلوی کو حضرت اقدس کی طرف سے دعوت دی گئی تھی۔(عرفانی)