حیاتِ احمد (حیاتِ احمد۔ جلد سوم) — Page 382
حیات احمد ۳۸۲ جلد سوم الہام سے ہم پر ظاہر فرما۔تا اگر مردود ہے تو اس کے قبول کرنے سے ہم گمراہ نہ ہوں۔اور اگر مقبول ہے اور تیری طرف سے ہے تو اس کے انکار اور اس کی اہانت سے ہم ہلاک نہ ہو جائیں۔ہمیں ہر قسم کے فتنہ سے بچا کہ ہر ایک قوت تجھ کو ہی ہے۔آمین۔یہ استخارہ کم سے کم دو ہفتے کریں، لیکن اپنے نفس سے خالی ہو کر کیونکہ جو شخص بغض سے بھرا ہوا ہے اور بدظنی اس پر غالب آ گئی ہے اگر وہ خواب میں اس شخص کا حال دریافت کرنا چاہے جس کو وہ بہت ہی بُرا جانتا ہے تو شیطان آتا ہے اور موافق اس ظلمت کے جو اس کے دل میں ہے اور پُر ظلمت خیالات اپنی طرف سے اس کے دل میں ڈال دیتا ہے پس اس کا حال پہلے سے بھی بدتر ہوتا ہے سواگر تو خدا تعالیٰ سے کوئی خبر دریافت کرنا چاہے۔تو اپنے سینہ کو بکلی بغض وعناد سے دھو ڈال اور اپنے تیں بکلی خالی النفس کر کے اور دونوں پہلوؤں بغض اور محبت سے الگ ہو کر اس ہدایت کی روشنی مانگ کہ وہ ضرور اپنے وعدہ کے موافق اپنی طرف سے روشنی نازل کرے گا۔جس پر نفسانی اوہام کا کوئی دُخان نہیں ہوگا۔سواے حق کے طالبو، ان مولویوں کی باتوں سے فتنہ میں مت پڑو۔اٹھو اور کچھ مجاہدہ کر کے اس قومی اور قدیر اور علیم اور ہادی مطلق سے مدد چاہو اور دیکھو کہ اب میں نے یہ روحانی تبلیغ بھی کر دی ہے۔آئندہ تمہیں اختیار ہے۔وَالسَّلَامُ عَلَى مَنِ اتَّبَعَ الْهُدَى المبلغ غلام احمد عفی عنہ ( منقول از نشان آسمانی ایڈیشن اول مطبوعہ ریاض ہند پریس امرتسر صفحہ ۳۶ ، ۳۷۔روحانی خزائن جلد ۴ صفحه۴۰۱،۴۰۰)