بنیادی مسائل کے جوابات — Page 134
تلاوت قرآن کریم سوال: ایک دوست نے حضور انور ایدہ اللہ تعالیٰ بنصرہ العزیز کی خدمت اقدس میں قرآن کریم کی تلاوت کے بعد ”صَدَقَ اللهُ الْعَظیم“ کے الفاظ پڑھنے کے بارہ میں اپنی رائے کا اظہار کر کے رہنمائی چاہی ہے۔اس پر حضور انور ایدہ اللہ تعالیٰ بنصرہ العزیز نے اپنے مکتوب مؤرخہ 11 جون 2019ء میں درج ذیل جواب عطا فرمایا۔حضور انور نے فرمایا: جواب: میں نے اس بارہ میں تحقیق کروائی ہے۔علماء میں دونوں قسم کے نقطہ ہائے نظر پائے جاتے ہیں۔جو اس کے جواز کے قائل ہیں انہوں نے بعض قرآنی آیت اور احادیث سے استدلال کر کے اس کے جواز کی راہ نکالی ہے۔میرے نزدیک بھی اگر کوئی تلاوت کرنے کے بعد یہ الفاظ پڑھ لے تو اس میں کوئی حرج کی بات نہیں۔کیونکہ اس میں کوئی برائی تو بہر حال نہیں بلکہ اللہ تعالیٰ کے کلام کے سچا ہونے کی تصدیق کی جارہی ہے۔لیکن ان الفاظ کا مطلب جانے بغیر صرف ایک رسم کے طور پر انہیں دہرا دینا ایک بے معنی فعل شمار ہو گا۔(قسط نمبر 11، الفضل انٹر نیشنل 12 مارچ 2021ء صفحہ 11) 134