ذکر حبیب — Page 240
240 تھا کہ دارالامن کے تازہ حالات سے کچھ ہمیں اطلاع دو۔اس واسطے میں چاہتا ہوں کہ راستہ میں ان کی ملاقات کرتا ہوا، آپ کے پاس پہنچوں اور مجھے امید ہے کہ وہ اس عریضہ کو دیکھ کر بہت ہی جلد آپ کی خدمت میں ارسال فرما دیں گے۔“ انگریزی پڑھنے کا ثواب تین سال کے اندر طلب نشان والی پیشگوئی کے اشتہار کا انگریزی میں ترجمہ ہو کر لاہور میں طبع ہونے کے واسطے آیا ہوا تھا۔اس کو لے کر ہفتہ کی شام کو میں یہاں سے روانہ ہوا۔اور چھین کے اسٹیشن پر اُتر کر دار الامان کو روانہ ہوا۔راستہ میں سے شیخ چراغ علی صاحب جو کہ شیخ حامد علی صاحب کے چچا ہیں ، نہایت مہربانی سے میرے ساتھ ہوئے۔اور میرا بوجھ اٹھایا۔اور مجھے راستہ دکھایا۔اور ہم دارالامان میں پہنچے۔فالحمد للہ علی ذالک۔نماز فجر کے وقت حضور اقدس کی زیارت مسجد میں ہوئی جس سے قلب کو نور حاصل ہوا۔اور بعد نماز فجر آپ نے وہ انگریزی اشتہا راول سے آخر تک سُنا۔عبارت انگریزی پڑھ کر اور ہر ایک فقرہ کے ساتھ ترجمہ کر کے میں نے سُنایا۔اور اس کے بعد آپ اندر تشریف لے گئے۔اور پھر ۹ بجے کے قریب سیر کے واسطے تشریف لائے۔ملتے ہی فرمایا ”آپ نے اس کام میں خوب ہمت کی فرمایا کہ اس میں اللہ تعالیٰ کی حکمت ہے۔کہ ہم نے انگریزی نہیں پڑھی کہ وہ آپ لوگوں کو ثواب میں شامل کرنا چاہتا ہے۔انگریزی اگر ہم پڑھے ہوئے ہوتے تو اُردو کی طرح اس کے بھی دو چار صفحے ہر روز ہم لکھ دیا کرتے۔مگر خدا نے چاہا کہ جیسے آپ ہیں اور مولوی محمد علی صاحب ہیں۔آپ لوگوں کو بھی یہ ثواب دیا جائے۔“ میں نے عرض کی ، کہ یہ ہمت اور ثواب تو مولوی محمد علی صاحب کا ہی ہے۔فرمایا کہ عالمگیر کے زمانہ میں مسجد شاہی کو آگ لگ گئی۔تو لوگ دوڑے دوڑے بادشاہ سلامت کے پاس پہنچے اور عرض کی کہ مسجد کو تو آگ لگ گئی۔اِس خبر کو سُن کر وہ فوراً سجدہ میں گرا اور شکر کیا۔حاشیہ نشینوں نے تعجب سے پوچھا کہ حضور سلامت یہ کونسا وقت شکر گذاری کا ہے۔کہ خانہ خدا کو آگ لگ گئی ہے۔اور مسلمانوں کے دلوں کو سخت صدمہ پہنچا ہے۔تو بادشاہ نے کہا کہ میں مدت سے سوچتا تھا اور آہ سر د بھرتا تھا کہ اتنی بڑی عظیم الشان مسجد جو بنی ہے اور اس عمارت کے ذریعہ سے ہزار ہا مخلوقات کو فائدہ پہنچتا ہے۔کاش کوئی ایسی تجویز ہوتی کہ اس کارِ خیر میں کوئی میرا بھی حصہ ہوتا۔لیکن چاروں طرف سے میں اس کو ایسا مکمل اور بے نقص دیکھتا تھا کہ مجھے سُوجھ نہ سکتا کہ اس میں میرا ثواب کس طرح ہو جاوے۔سو آج خدا نے میرے واسطے حصول ثواب کی ایک راہ نکال دی۔والله السميع العليم "