تاریخ احمدیت (جلد 20) — Page 32
تاریخ احمدیت 32 جلد ۲۰ برادران جماعت احمدیہ السلام عليكم و رحمة الله و بركاته خدا تعالیٰ کے فضل سے وقف جدید کا تیسرا سال شروع ہو رہا ہے۔پہلے بھی میں آپ لوگوں کو برابر تحریک کرتا رہا ہوں کہ وقف جدید کو مضبوط بنانا ضروری ہے۔لیکن اب تو کام کی وسعت کی وجہ سے اس کی اہمیت اور بھی بڑھ گئی ہے۔پس جہاں اللہ تعالیٰ نے آپ کو مالوں میں ترقی دی ہے وہاں آپ کو سلسلہ کی ترقی کے لئے بھی دل کھول کر چندہ دینا چاہئے تا اللہ تعالیٰ سارے پاکستان اور سارے ہندوستان میں ( دین حق ) اور احمدیت کو پھیلا دے۔اللہ تعالیٰ آپ لوگوں کو توفیق دے کہ آپ وقت کی آواز کو سنیں اور کانوں میں روئی نہ ڈالے رکھیں۔حضرت مسیح موعود علیہ الصلوۃ والسلام فرماتے ہیں آسمان بارد نشاں الوقت میگوید زمیں این دو شاہد از پیئے تصدیق من استاده اند خدا کرے کہ آپ آسمان کی آواز کوسنیں اور زمین کی آواز کو بھی سنیں تا کہ آپ کو سرفرازی حاصل ہو۔یادرکھو جو شخص وقت پر خدا کی آواز کو نہیں سنتا وہ بد بخت ہوتا ہے۔وہ دن آگئے ہیں کہ جب ساری دنیا احمدیت کے ذریعہ ( دینِ حق ) میں داخل ہوگی اگر اس میں آپ کا حصہ نہیں ہوگا۔تو کتنی بدبختی ہوگی۔تبلیغ کرنا ہر احمدی کا فرض ہے نہ معلوم آپ اس میں کتنا حصہ لیتے ہیں۔لیکن اس زمانہ میں تبلیغ کا بڑا ذریعہ اشاعت دین کے لئے چندہ دینا ہے اس لئے آپ لوگوں کا فرض ہے کہ وقف جدید کے چندہ میں بڑھ چڑھکر حصہ لیں۔نبی کریم صلی اللہ علیہ وسلم فرماتے ہیں کہ اگر کوئی شخص کسی کو ظلم کرتا دیکھے تو اس کو ہاتھ سے روک دے۔لیکن اگر وہ یہ طاقت نہیں رکھتا تو ظلم کو دل سے برا سمجھے۔اس لئے کم از کم آپ کے دل میں تو یہ خواہش پیدا ہونی چاہئے۔کہ آپ ( دین حق ) کے لئے قربانی کریں۔جب آپ دل میں خواہش کریں گے تو آپ کو خدا کے فضل سے عمل کی توفیق بھی مل جائے گی۔میں دُعا کرتا ہوں کہ اللہ تعالیٰ آپ کو سچا ایمان بخشے اور آپ کو بڑھ چڑھ کر قربانیوں کی تو فیق عطا کرے۔تا ہم میں سے بوڑھے سے بوڑھا شخص بھی ( دینِ حق ) اور احمدیت کی ترقی کو دیکھ سکے۔اللهم امين، اللهم امين اللهم امين