مکتوبات احمد (جلد پنجم) — Page 208
بِسْمِ اللّٰہِ الرَّحْمٰنِ الرَّحِیْمِ نَحْمَدُہٗ وَ نُصَلِّیْ عَلٰی رَسُوْلِہِ الْکَرِیْمِ حضرت مرشدنا و مہدینا مسیح موعود ومہدی معہود ؑ السلام علیکم و رحمۃ اللہ و برکاتہ قاضی صاحب کے لڑکے کی وفات کی تحریک۱؎ پر حضور نے جمعہ کے دن جو ہمدردی کا وعظ کیا تھا۔اس کو میں نے اس طرح درج اخبار کرنے کا ارادہ کیا تھا کہ موجودہ واقعہ کا ذکر نہ ہو اور عام طور پر جماعت احمدیہ کو ایک نصیحت ہو۔کہ ہماری جماعت کا کوئی فرد شہید طاعون سے ہو تو کس طرح ہمدردی کرنی چاہئیے۔مگر افسوس ہے کہ بہ سبب نہ ہونے پریس کے ہمارا اخبار اب تک نکل نہیں سکا اور شیخ یعقوب علی صاحب نے اِس واقعہ کو اور جماعت کی غلطی کو صاف اور کُھلے لفظوں میں شائع کر دیا ہے۔اب کیا حضور پسند کرتے ہیں کہ میں بھی اِسی طرح لِکھ دوں۔اس میں شماتت کا اندیشہ ہے اور دشمن نکتہ چینی کریں گے۔لیکن الحکم شائع ہو چکا ہے۔یا میں اپنی پہلی تجویز کے مطابق اس کو عام نصیحت کے پیرایہ میں لِکھوں۔والسلام حضورکی جوتیوں کا غلام محمد صادق عفی عنہ مکتوب نمبر ۳۸ السلام علیکم و رحمۃ اللہ و برکاتہ میرے نزدیک بہتر ہے کہ کوئی ذکر نہ کیا جائے۔صرف نصیحت کی تقریر لکھ دی جائے۔مرزا غلام احمدعفی عنہ