مسلمانوں کے سائنسی کارنامے — Page 3
الرجی (allergy )اور امیونولوجی (immunology) کی سب سے پہلے تشخیص کس نے کی تھی؟ جراثیم (bacteria) کی دریافت سب سے پہلے کس نے کی تھی ؟ پھیپھڑوں میں خون کی گردش کا نظریہ سب سے پہلے کس نے پیش کیا تھا؟ امراض چشم اور ان کے علاج سے دنیا کو کس نے روشناس کرایا۔سرجری کی باضابطہ ابتدا کس نے کی؟ منظم ہسپتال کا تصور سب سے پہلے کس نے پیش کیا ؟ فوٹو لینے والے کیمرے کا خیال سب سے پہلے کس کو آیا ؟ ریاضی میں جدید علم ہندسہ اور صفر کے علاوہ الجبرا اور جیومیٹری سے دنیا کو کس نے متعارف کرایا ؟ سورج پرسن اسپاٹس (sun spots) کس نے دریافت کئے تھے؟ بارود(gun powder) کس نے دریافت کیا؟ میزائل (missile) کس نے بنانے شروع کئے؟ شیشہ کس نے ایجاد کیا؟ گھڑی کی ایجاد کا سہرا کس کے سر ہے؟ ان سب دلچسپ سوالوں کے جوابات آپ کو اس کتاب میں ملیں گے۔اب ایک مود بانه گزارش: سائنسی تعلیم کے فروغ کے لیے برصغیر میں اردو میں سائنس کی تعلیم کا سب سے بڑا مسئلہ یہ ہے کہ اردو میں تکنیکی الفاظ کو کس طرح لکھا جائے۔مثلاً یہ کہنا تو آسان ہے کہ ایٹم (atom) کے اندر مرکزہ ہوتا ہے اور برقئے باہر چکر لگاتے ہیں جبکہ انگلش میں اس کا اظہار یوں ہوگا کہ ایٹم کے اندر نیوکس (nucleus) ہوتا ہے اور الیکٹران (electrons) باہر چکر لگاتے ہیں۔اسکول میں طالب علم ان تکنیکی الفاظ کو سکھ تو لے گا مگر یو نیورسٹی سطح پر جا کر اسے تمام ٹیکنیکل اصطلاحات (technical tems) انگریزی میں پڑھنے ہوں گے۔دنیا کے تمام سائنسی رسالے (journals) اور جدید تحقیقات پر مبنی مضامین آئے دن انگریزی میں ہی لکھے اور پڑھے جاتے ہیں۔اس لئے بہتر ہے کہ طالب علم شروع ہی سے ان الفاظ کو انگریزی میں سیکھ لے اور تمام ٹیکنیکل الفاظ جوں کے توں اردو میں لکھ دیے جائیں۔میری ناقص رائے میں اردو میں تکنیکی اصطلاحات کے متبادل الفاظ ایجاد کرنے کی ضرورت نہیں ہے۔بولنے میں اردو کی یہ حالت ہے کہ انگریزی کے الفاظ روز مرہ گفتگو میں زیادہ بولے جاتے ہیں۔اس لیے تحریر میں ایسا کیوں نہیں ہوسکتا؟ میں مرکز فروغ سائنس، علی گڑھ مسلم یونیورسٹی کے ڈائریکٹر پروفیسر سید ابوالہاشم رضوی صاحب کا شکر گزار ہوں جن کی تحریک پر یہ کتاب لکھی گئی ہے۔مطلوبہ کتابوں کے حصول میں کنگسٹن کی پبلک لائبریری (Kingston Public Library) کا خاص طور پر تہ دل سے ممنون ہوں جنہوں نے مجھے دوسرے شہروں کی لائبریریوں سے مطلوبہ کتابیں منگوا کر دیں۔میں یہ کتاب بشری ، ذیشان اور عدنان کے نام معنون کرتا ہوں۔کنگسٹن کینیڈا محمد زکریا ورک