خطبات مسرور (جلد 10۔ 2012ء) — Page 475
خطبات مسرور جلد دہم 475 خطبه جمعه فرمودہ مورخہ 3 اگست 2012 ء اور ایسے نفس سے جو سیر نہیں ہوتا۔اور ایسے علم سے جو نفع رساں نہیں ہے۔میں تجھ سے ان چاروں سے پناہ اورا۔چاہتا ہوں۔(سنن الترمذى كتاب الدعوات باب 68 حدیث: 3482) اللہ تعالیٰ کرے کہ ہم اس دعا کو سمجھنے والے بھی ہوں۔آنحضرت صلی اللہ علیہ وسلم کی ایک اور دعا بھی پیش کرتا ہوں۔یہ جو دعا ہے عاجزی اور خشیۃ اللہ کی اُن بلندیوں تک پہنچی ہوئی ہے جو آپ کی خشیت کا ایک کامل نمونہ ہے۔حجتہ الوداع کے موقع پر دعا کرتے ہوئے آپ نے اپنے مولیٰ کے حضور عرض کیا کہ اے اللہ ! تو میری باتوں کو سنتا ہے اور میرے حال کو دیکھتا ہے۔میری پوشیدہ باتوں اور ظاہری امور سے تو خوب واقف ہے۔میرا کوئی بھی معاملہ تجھ پر کچھ بھی تو مخفی نہیں۔میں ایک بدحال فقیر اور محتاج ہوں۔تیری مدد اور پناہ کا طالب، سہا اور ڈرا ہوا، اپنے گناہوں کا اقراری ہوں اور معترف ہو کر میں تیرے پاس آیا ہوں۔میں تجھ سے ایک عاجز مسکین کی طرح سوال کرتا ہوں۔تیرے حضور میں ایک ذلیل گنہگار کی طرح زاری کرتا ہوں۔ایک اندھے نابینا کی طرح خوفزدہ تجھ سے دعا کرتا ہوں۔میری گردن تیرے آگے جھکی ہوئی ہے۔میرے آنسو تیرے حضور بہ رہے ہیں۔میرا جسم تیرا مطیع ہو کر سجدے میں گرا پڑا ہے اور ناک خاک آلودہ ہے۔اے اللہ ! تو مجھے اپنے حضور دعا کرنے میں بد بخت نہ ٹھہرا دینا۔میرے ساتھ مہربانی اور رحم کا سلوک فرمانا۔اے وہ جو سب سے زیادہ التجاؤں کو قبول کرتا ہے اور سب سے بہتر عطا فرمانے والا ہے، میری دعا قبول کر لینا۔(المعجم الكبير للطبرانی جلد 11 صفحه 140 عطاء عن ابن عباس حدیث : 11405 مطبوعہ داراحیاء التراث العربی) پس یہ وہ عظیم نبی صلی اللہ علیہ وسلم ہیں جنہوں نے خشیة اللہ کا عظیم نمونہ ہر آن اپنی اُمت کے سامنے پیش فرمایا۔ہر بات دیکھ لیں، آنحضرت صلی اللہ علیہ وسلم کا ہر عمل دیکھ لیں اس خشیت سے بھرا پڑا ہے۔خدا تعالیٰ کے خوف سے لرزاں و ترساں ہیں۔باوجود اس کے کہ خدا تعالیٰ کے مقرب ترین آپ ہیں۔ان کے ساتھ جڑنے والوں نے بھی رَضِيَ اللهُ عَنْهُمْ کی خوشخبری سنی ہے۔پس یہ اسوہ حسنہ ہے اور یہ خشیۃ اللہ ہے۔اگر ہم نے اس نبی صلی اللہ علیہ وسلم کی پیروی کی اور اس چیز کو اپنایا، اپنے اندر پیدا کیا تو ہم بھی اللہ تعالیٰ کے فضلوں کو حاصل کرنے والے بن سکتے ہیں۔اللہ تعالیٰ ہمیں توفیق دے کہ اس رمضان میں اللہ تعالیٰ کی خشیت کی روح کو سمجھتے ہوئے اس کے مطابق زندگی گزارنے والے ہوں۔اللہ کرے یہ رمضان ہمارے لئے روحانی انقلاب پیدا کرنے والا بن جائے۔الفضل انٹرنیشنل مورخہ 24 اگست تا 30 اگست 2012 جلد 19 شماره 34 صفحہ 5 تا8)