اصحاب احمد (جلد 6) — Page 100
100 ضروری کام ہے۔آخر وہاں کے لوگوں کو آپ لوگوں کو ہی مسائل بتانے پڑیں گے۔جماعت احمدیہ کی وحدت اور اس کی ضرورت لوگوں پر آشکارا کریں۔اسلام اور احمدیت کو جو اس زمانہ میں دو مترادف لفظ ہیں۔صفائی کے ساتھ پیش کریں اور ایک مذہب کے طور پر پیش کریں اور لوگوں کے دلوں سے یہ خیال مٹائیں کہ یہ بھی ایک سوسائٹی ہے۔خدا تعالیٰ کی مرضی کے مقابلے میں اپنی مرضی کو چھوڑ دینے کی تعلیم اہل یورپ کو دیں۔اب تک وہ خدا تعالیٰ پر بھی اعتراض کر لینا جائز سمجھتے ہیں۔اور اپنے خیال کے مطابق مذہب کو رکھنا چاہتے ہیں۔ان کو بتائیں کہ سب دنیا کی حکومت کرو مگر خدا کی حکومت کو اپنے نفس پر مقدم کرو۔اس بات کی پرواہ نہ کریں کہ کس قدر لوگ آپ کی بات مانتے ہیں۔اسلامی سادگی ان لوگوں میں پیدا کرنے کی کوشش کریں۔لفظوں سے کھینچ کر روحانیت پیدا کرنے کی کوشش ( کرنے کی طرف متوجہ ہوں۔آپ تو ایک گھوڑے پر بھی سوار نہیں ہو سکتے۔لیکن ایک شیر پر سوار ہونے کیلئے جاتے ہیں۔بہت ہیں جنہوں نے اس پر سوار ہونے کی کوشش کی۔لیکن بجائے اس کی پیٹھ پر سوار ہونے کے اس کے پیٹ میں بیٹھ گئے۔آپ دعاء سے کام لیں تا کہ یہ شیر آپ کے آگے اپنی گردن جھکا دے۔ہر مشکل کے وقت دعاء کریں اور خط برابر لکھتے رہیں۔میرا خط جائے نہ جائے۔آپ ہر ہفتہ مفصل خط جس میں سب حال مفصل ہو لکھتے رہیں۔اگر کوئی تکلیف ہو تو خدا تعالیٰ سے دعا کریں۔اگر کوئی بات دریافت کرنی ہو اور فوری جواب کی ضرورت ہو خط لکھ کر ڈال دیں اور خاص طور پر دعا کریں۔تعجب نہ کریں۔اگر خط کے پہنچتے ہی یا پہنچنے سے پہلے ہی جواب مل جائے۔خدا کی قدرت وسیع اور اس کی طاقت بے انتہاء ہے۔اپنے اندر تصوف کا رنگ پیدا کریں۔کم خوردن۔کم گفتن کم خفتن عمدہ نسخہ ہے۔تہجد ایک بڑا ہتھیار ہے۔یورپ کا اثر اس سے محروم رکھتا ہے۔کیونکہ لوگ ایک بجے سوتے ہیں۔آٹھ بجے اٹھتے ہیں۔آپ عشاء کے ساتھ سوجائیں۔تبلیغ میں حرج ہوگا۔لیکن ی نقصان دوسری طرح خدا تعالیٰ پورا کر دیگا۔دن کو سننے والے لوگ آپ کی طرف کھنچے چلے آئیں گے۔چھوٹے چھوٹے گاؤں میں غریبوں اور زمینداروں کو اور محنت پیشہ لوگوں کو جا کر تبلیغ کریں۔یہ لوگ حق کو جلدی قبول کریں گے۔اور جلد اپنے اندر روحانیت پیدا