تحریک جدید ۔ ایک الٰہی تحریک (جلد ششم۔ 1982 تا 1984) — Page 211
تحریک جدید - ایک ابی تحریک۔۔۔جلد ششم خطبہ جمعہ فرمودہ 05 نومبر 1982ء جائزہ یہ ہے کہ یہاں بھی دفتر سوم میں بڑی بھاری گنجائش موجود ہے۔یہ کام میں لجنہ اماءاللہ کے سپرد کرتا ہوں۔کیونکہ اس سے پہلے دو دفتروں میں سے ایک دفتر یعنی دفتر اول، خدام الاحمدیہ کی خصوصی تحویل میں دے دیا گیا ، ان معنوں میں کہ وہ چندوں کی طرف خصوصی توجہ کریں۔دفتر دوم، انصار اللہ کے سپرد کیا گیا کہ وہ اس طرف توجہ کریں اور اللہ تعالیٰ کے فضل سے انصار نے اس میں بڑی محنت سے کام کیا ہے۔تیسرا دفتر ، دفتر سوم کسی ذیلی تنظیم کے سپردنہیں کیا گیا۔ہو سکتا ہے یہ بھی وجہ ہو، اس میں غفلت اور کمزوری کی۔تو امید ہے کہ لجنہ اماءاللہ، انشاء اللہ تعالی بڑی تیزی کے ساتھ اس طرف توجہ کرے گی۔اور لجنہ کا تجربہ یہ ہے کہ جب وہ کسی کام کی طرف توجہ کرتی ہیں تو ان کی پوری کوشش ہوتی ہے کہ مردوں کو شرمندہ کریں اور ان کو پیچھے چھوڑ جائیں۔اور بسا اوقات وہ اس میں کامیاب بھی ہو جاتی ہیں۔اس لئے مرد بھی کمر ہمت کس لیں۔جب وہ دوڑیں گی تو آپ کو بھی دوڑنا پڑے گا۔آپ قوام ہیں، آپ کو اپنا وقار اور اپنا مقام قائم رکھنے کے لئے قربانیوں میں لازماً آگے بڑھنا ہوگا۔اس طرح خدا تعالیٰ کے فضل سے فَاسْتَبِقُوا الْخَيْرَتِ کا ایک بہت ہی حسین منظر ہمارے سامنے آ جائے گا۔یعنی جماعت کے تمام حصے ایک دوسرے سے سبقت لے جانے کے لئے دوڑ رہے ہوں گے۔اللہ تعالیٰ ہمیں توفیق عطا فرمائے کہ ہم دنیا کے بڑھتے ہوئے تقاضوں کے مطابق ہر آن بڑھتی ہوئی قربانی پیش کرتے رہیں۔خدمت کے نئے نئے میدان ظاہر ہورہے ہیں اور بڑی تیزی کے ساتھ پھیل رہے ہیں۔اور دنیا کی طرف سے آپ کو بڑی کثرت کے ساتھ بلا وادیا جارہا ہے۔آپ کو جو جماعت احمدیہ کے خدام ہیں، جو جماعت احمدیہ کے انصار ہیں، جو جماعت احمدیہ کی لجنات ہیں، دنیا کے ممالک آپ کو بلا رہے ہیں کہ آؤ اور ہمیں بچاؤ۔اگر آپ نے اس آواز پر لبیک نہ کہا تو کوئی اور ایسا کان نہیں ہے، جس کے پر دے اس آواز سے لرزنے لگیں اور یہ آواز ان کے دلوں میں ارتعاش پیدا کر دے۔اول تو ان کو کوئی بلا نہیں رہا۔اور اگر بلائے گا بھی تو سننے والے کان نہیں ہیں۔اور اگر سننے والے کان بھی ہوں تو وہ دل میسر نہیں ہیں، جو خدا کی خاطر قربانیوں کے نام پر ہیجان پکڑ جاتے ہیں اور وہ اعضاء میسر نہیں ہیں، جو عمل کے لئے بے قرار ہو جاتے ہیں۔یہ توفیق حضرت مسیح موعود علیہ الصلوٰۃ والسلام کی جماعت کو عطا ہوئی ہے۔اس لئے ساری دنیا کے تقاضے آپ نے ہی پورے کرنے ہیں۔پس دعائیں کریں کہ اللہ تعالیٰ ان پھیلتے ہوئے تقاضوں کے مطابق ہمیں آگے بڑھنے اور لبیک لبیک اور اللھم لبیک کہنے کی توفیق عطا فرمائے۔آمین۔211