حقائق الفرقان (جلد ۴) — Page 571
پیدا ہوئی ہیں۔اور اندھیرا کرنے والے کی شرارت سے جبکہ وہ چھپ جاوے اور ان کی شرارت سے جو گرہوں میں پھونکیں دے کر مخلوقِ الہٰی کو دُکھ دینے کے درپے رہتے ہیں اور حاسد کے شر سے جبکہ وہ حسد پر کمر باندھے۔یہ سورہ شریفہ مدنی ہے یعنی مدینہ منوّرہ میں نازل ہوئی تھی۔اس میں کے بعد پانچ آیتیں ہیں۔اور تئیس کلمے ہیں اور تہتر حروف ہیں۔اس سورہ شریفہ کی تفسیر سے پہلے اس امر کا بیان کرنا ضروری معلوم ہوتا ہے۔کہ اس سورۃ کے شانِ نزول میں بعض مفسرّوں نے یہ بیان کیا ہے کہ کسی یہودی نے آنحضرت صلی اﷲ علیہ وسلم پر جادو کیا تھا اور اس قسم کے جادوگروں کے شر سے محفوظ رکھنے کے واسطے اﷲ تعالیٰ نے یہ دعا سکھلائی۔اس واقعہ کو اگر احادیث میں دیکھا جائے۔اوّلؔ تو اس حدیث کا راوی صرف ایک شخص ہے یعنی ھشام۔حالانکہ اتنے بڑے واقعہ کے واسطے ضروری تھا کہ کوئی اور صاحب بھی اس کا ذکر کرتے۔دومؔ اگر یہ واقعہ صحیح بھی ہو تو اس سے یہ نہیں ثابت ہوتا ہے کہ آنحضرتؐ پر اس جادو کا کچھ اثر ہو گیا تھا یا آنحضرت نے ان جادو کرنے والے لوگوں کا کچھ پیچھا کیا تھا یا ان کو گرفتار کیا تھا۔ہاں اس میں کوئی شک نہیں ہو سکتا کہ ہر زمانہ میں اور ہر ملک میں اسی قسم کے آدمی ہوا کرتے ہیں جن کا یہ پیشہ ہوا کرتا ہے کہ وہ لوگ ں پر جادو کیا کریں۔اور یہ لوگ تین قسم کے ہوتے ہیں۔ایک تو وہ جو خفیہ سازشوں اور شرارتوں کے ذریعہ سے لوگوں کو سزا دیتے ہیں۔مثلاً ایک شخص ان کے پاس آیا ہے۔اور وہ ایک دوسرے شخص کے ساتھ دشمنی رکھتا ہے۔اس واسطے ان کے پاس اپنی یہ خواہش لاتا ہے کہ میرا دشمن مر جائے یا کسی سخت بیماری میں مبتلا ہو جائے یا مجنون ہو جائے تو وہ اس شخص کو ویسے ہی کوئی تعویذ بنا دیں گے یا کوئی تاگہ گریں ڈال کر دیدیں گے اور کہہ دیں گے کہ یہ کسی طرح اپنے دشمنوں کو کھلاؤ یا اس کے گھر میں ڈال دو۔یا اور کوئی بات اس قسم کی بتلادیں گے لیکن دراصل یہ صرف ایک ظاہری بات اس شخص کو دھوکا دینے والی ہو گی اور خفیہ طور پر وہ اس کے دشمن کو کسی دوائی کے ذریعہ سے بیمار کرنے یا مجنون کرنے یا ہلاک کرنے پر کمر باندھیں گے۔اور کسی نہ کسی حیلہ سے اس کام کو پورا کر کے اپنے جادو گر ہونے کا لوگوں کو یقین دلائیں گے۔دوسری قسم کے وہ لوگ ہونے ہیں۔جو توجّہ کے ذریعہ سے اس معاملہ میں کامیابی حاصل کرنا چاہتے ہیں اور دوسروں کو دُکھ دینے کے درپے رہتے ہیں۔اس قسم کے لوگ بھی ہمیشہ دنیا میں ہوتے رہے ہیں۔اور آجکل اس گروہ کی ایک بڑی جماعت امریکہ میں موجود ہے۔ان کا مطلب بھی سوائے شرارت کے اور کچھ نہیں ہوتا۔اور یہی وجہ ہے کہ وہ اپنے پیشہ کو مخفی رکھتے ہیں۔ورنہ گورنمنٹ ایسے لوگوں کو ہر جگہ گرفتار کر کے