حقائق الفرقان (جلد ۴) — Page 153
عیسٰی نکل آئے گا۔یعنی وہ مریمی صفات سے عیسوی صفات کی طرف منتقل ہو جائے گا۔گویا مریم ہونے کی صفت نے عیسٰی ہونے کا بچہ دیا اور اس طرح پر وہ ابنِ مریم کہلائے گا۔جیسا کہ براہینِ احمدیہ میں اوّل میرا نام مریم رکھا گیا۔اور اسی کی طرف اشارہ الہام صفحہ ۲۳۹ میں اور وہ یہ ہے کہ اَنّٰی لَک ھٰذَا یعنی اے مریم تو نے یہ نعمت کہاں سے پائی اور اسی کی طرف اشارہ ہے صفحہ ۲۲۶ میں یعنی اس الہام میں کہ ھُزَّ اِلَیْک بِجِذْعِ النَّخْلَۃِ یعنی اے مریم کھجور کے تنا کو ہلا۔اور پھر اس کے بعد صفحہ ۴۹۶ براہین احمدیہ میں یہ الہام درج ہے۔یَامَرْیَمُ اسْکُنْ اَنْتَ وَ زَوْجُک الْجَنَّۃَ نَفَحْتُ فِیْک مِنْ لَّدُنِیْ رُوْحَ الصِّدْقِ یعنی اے مریم تُو مع اپنے دوستوں کے جنّت میں داخل ہو۔مَیں نے تجھ میں اپنے پاس سے صدق کی رُوح پھونک دی۔خدا نے اس آیت میں میرا نام روح الصدق رکھا۔یہ اس آیت کے مقابل پر ہے کہ نَفَخْنَا فِیْہِ مِنْ رُّوْحِنَا پس اس جگہ گویا استعارہ کے رنگ میں مریم کے پیٹ میں عیسٰی کی رُوح جا پڑی جس کا نام روح الصدق ہے پھر سب کے آخر میں صفحہ ۵۵۶ براہین احمدیہ میں وہ عیسٰی جو مریم کے پیٹ میں تھا۔اس کے پیدا ہونے کے بارہ میں یہ الہام ہوا۔یَاعِیْسٰی اِنِّی مُتَوَفِّیْکَ وَ رَافِعُکَ اِلَیَّ وَ جاعِلُ الَّذِیْنَ اتَّبَعُوْکَ فَوْقَ الَّذِیْنَ کَفَرُوْا اِلٰی یَوْمِ الْقِیَامَۃِ اس جگہ میرا نام عیسٰی رکھا گیا۔اور اس الہام نے ظاہر کیا کہ وہ عیسٰی پیدا ہو گیا جس کی رُوح کا نفخ صفحہ ۴۹۶ میں ظاہر کیا گیا تھا۔پس اس لحاظ سے میں عیسٰی بن مریم کہلایا۔کیونکہ میری عیسوی حیثیت مریمی حیثیت سے خدا کے نفخ سے پیدا ہوئی۔دیکھو صفحہ ۴۹۶ اور صفحہ ۵۵۶ براہین احمدّیہ اور اسی واقعہ کو سورۃ تحریم میں بطور پیشگوئی کمال تصریح سے بیان کیا گیا ہے کہ عیسٰی ابن مریم اس امّت میں اس طرح پیدا ہو گا کہ پہلے کوئی فرد اس اُمّت کا مریم بنایا جائے گا اور پھر بعد اس کے اس مریم میں عیسٰی کی رُوح پھونک دی جائے گی۔پس وہ مریمیت کے رحم میں ایک مدّت تک پرورش پا کر عیسٰی کی روحانیت میں تولّد پائے گا۔اور اس طرح وہ عیسٰی بن مریم کہلائے گا۔یہ وہ خبر محمدی ابنِ مریم کے بارہ میں ہے جو قرآن شریف یعنی سورہ تحریم میں اس زمانہ سے تیرہ سو برس پہلے بیان کی گئی ہے۔اور پھر براہین احمدیہ میں سورہ التحریم کی ان آیات کی خدا نے خود تفسیر فرما دی ہے۔قرآن شریف موجود ہے۔ایک طرف قرآن شریف کو رکھو اور ایک طرف براہین احمدیہ کو اور پھر انصاف اور عقل اور تقوٰی سے سوچو کہ وہ پیشگوئی جو سورہ التحریم میں تھی یعنی یہ کہ اس امت میں بھی کوئی فرد مریم کہلائے گا اور پھر مریم سے عیسٰی بنایا جائے گا۔گویا اس میں سے پیدا ہو گا۔وہ کسی رنگ میں براہین احمدیہ کے الہامات سے پوری ہوئی۔کیا یہ انسان کی قدرت ہے۔کیا یہ میرے اختیار میں تھا اور کیا مَیں اس وقت موجود تھا جبکہ قرآن شریف نازل ہو رہا تھا۔میں عرض کرتا کہ مجھے ابن مریم بنانے کے لئے کوئی آیت اتا ر دی جائے اور اس اعتراض سے مجھے