مکتوبات احمد (جلد دوم) — Page 585
مکتوب نمبر ۱۹۱ پوسٹ کارڈ بِسْمِ اللّٰہِ الرَّحْمٰنِ الرَّحِیْمِ نَحْمَدُہٗ وَنُصَلِّیْ عَلٰی رَسُوْلِہِ الْکَرِیْمِ مشفقی مکرمی۔اخویم منشی رستم علی صاحب سلّمہ تعالیٰ۔السلام علیکم ورحمۃ اللہ وبرکاتہ چونکہ ۲۷؍دسمبر ۱۸۹۱ء کو قادیان میں علماء مکذبین کے فیصلہ کے لئے ایک جلسہ ہوگا۔انشاء اللہ القدیر۔کثیر احباب اس جلسہ میں حاضر ہونگے۔لہٰذا مکلف ہوں کہ آپ بھی براہِ عنایت ضرور تشریف لاویں۔آتے ہوئے چار آنے کے پان ضرور لیتے آویں۔زیادہ خیریت ہے۔والسلام خاکسار غلام احمد ازقادیان نوٹ : اس خط پر از بندہ محمد اسماعیل السلام علیکم بھی درج ہے۔یہ مرزا محمد اسماعیل کی طرف سے ہے۔اس پر کوئی تاریخ درج نہیں۔مہر سے معلوم ہوتا ہے۔۲۲؍دسمبر ۱۸۹۱ء کو ڈاک میں ڈالا گیا اور لاہور کی مہر ۲۳؍ دسمبر ۱۸۹۱ء کی ہے۔یہ سب سے پہلے جلسہ کی اطلاع ہے اور اب جیسا کہ حضرت اقدس نے اس جلسہ کے اعلان میں ظاہر فرمایا تھا۔وہی جلسہ برابر انہی تاریخوں پر ہوتا چلا آرہا ہے۔گویا اب تک ۳۷ سالانہ جلسہ ہوچکے ہیں۔سلسلہ کی ابتدائی تاریخ اور حضرت اقدس کی اس وقت کی مصروفیت کا اندازہ ہوسکتا ہے کہ آپ ہی سب کام اپنے ہاتھ سے کرتے تھے۔(عرفانی)