خطبات وقف جدید — Page 349
349 حضرت خلیفہ امسیح الرابع خطبه جمعه فرموده 29 دسمبر 1989 ء بیت الفضل لندن تشہد، تعوذ اور سورہ فاتحہ کی تلاوت کے بعد حضور رحمہ اللہ تعالیٰ نے فرمایا: یہ جمعہ جس کی ادائیگی کیلئے آج ہم اکٹھے ہوئے ہیں سال 1989 ء کا آخری جمعہ ہے اور دوروز تک یہ سال اختتام پذیر ہونے والا ہے۔یہ سال نہ صرف یہ کہ جماعت احمدیہ کی تاریخ میں ایک غیر معمولی سال ہے بلکہ دنیا کی تاریخ میں بھی یہ سال ایک غیر معمولی سال بن کر اُبھرا ہے اور اس میں خدا تعالیٰ کی گہری حکمتیں پوشیدہ ہیں۔آپ کو یاد ہو گا جب ہم ربوہ میں 23 مارچ کا دن خوشی کے دن کے طور پر منانا چاہتے تھے تو جماعت کے دشمنوں نے پورا زور لگایا کہ وہ ربوہ میں یا دوسری جگہوں پر بھی جماعت احمدیہ کو اس دن کی خوشی نہ منانے دیں لیکن خدا کی تقدیر نے ان کو مجبور کر دیا تھا کہ وہ سارے ملک میں وہ دن خوشیوں کے دن کے طور پر منائیں اور 23 تاریخ یوم پاکستان کی ایسی تاریخ ہے جسے پاکستان کبھی نظر انداز نہیں کر سکتا۔تو بہت لمبا عرصہ پہلے جب 23 / مارچ کو حضرت اقدس مسیح موعود علیہ الصلوۃ والسلام نے لدھیانہ میں بیعت لی ، اس بات کو پاکستان بنانے والوں نے یا پاکستان کی راہ میں خدمتیں کرنے والوں نے تو کبھی سوچا بھی نہ ہوگا اور 23 مارچ کا دن یوم پاکستان مقرر ہونا ایک ایسا فعل ہے جس میں پاکستان کی تحریک سے تعلق رکھنے والوں کا کوئی بھی عمل دخل نہیں۔تقدیر نے یہ دن ان پر مسلط کر دیا ، ان پر ٹھونس دیا۔جب تک وہ اس دن کو جماعت احمدیہ کی خوشیوں کے طور پر نہیں مناتے یہ دن ان پر مسلط ہو چکا ہے اور جب وہ اس کو پہچان جائیں گے تو پھر وہ اصلی خوشیوں کا دن اُبھرے گا ، جب 23 / مارچ کو پاکستان کے قیام کا دن بھی ہوگا اور احمدیت کے قیام کا دن بھی ہوگا اور یہ دونوں خوشیاں مل کر عیدین بن جایا کریں گی۔اسی طرح کی ایک حکمت اس سال میں بھی پوشیدہ ہے۔اس سال میں ایسے حیرت انگیز تغیرات برپا ہوئے ہیں کہ دنیا کے دانشوروں کے وہم وگمان میں بھی نہیں تھا، یورپ میں جو کچھ ہوا ہے اور جو کچھ ہورہا ہے اور اسی طرح دنیا کے دیگر بعض ممالک میں تبدیلیوں کے جو آثار ظاہر ہورہے ہیں یہ وہ سب تبدیلیاں ایسی ہیں جن میں سیاست دانوں کا کوئی عمل دخل نہیں۔ان کے لئے یورپ میں ہونے والی عظیم تبدیلیاں اور اشتراکی ممالک میں ہونے والے انقلابات اسی طرح تعجب انگیز تھے جس طرح باقی دنیا کے لئے تعجب انگیز تھے۔ان کی کوششوں کا جہاں تک دخل ہے وہ کوششیں تو چین میں کی گئیں تھیں اور انسانی کوششیں نا کام