خطبات محمود (جلد 36) — Page 169
$1955 169 خطبات محمود جلد نمبر 36 تمہارا خدا تم کو ضائع نہیں کرے گا۔وہ تمہارا ہاتھ پکڑ لے گا اور تم محسوس کرو گے کہ تمہارا خدا تمہارے سامنے کھڑا ہے۔میرے پاس اس سفر میں ایک نو مسلم انگریز آیا اور اس نے کہا کہ میں بڑی کوشش کرتا ہوں کہ خدا تعالیٰ کا قرب حاصل کروں مگر مجھے پتا نہیں لگتا کہ میں اُس کے قریب ہو گیا ہوں یا نہیں؟ میں نے کہا تمہاری اس خواہش کا انحصار تمہارے اس ایمان اور یقین پر ہے کہ خدا تعالیٰ کے قرب کا دروازہ تمہارے لیے بند نہیں بلکہ تم بھی اس کے انعامات کو اُسی طرح حاصل کر سکتے ہو جس طرح پہلے لوگوں نے حاصل کیے۔اگر تم سچے دل سے یہ یقین رکھو کہ خدا تعالیٰ کے انعامات کے دروازے تمہارے لیے کھلے ہیں اور ہر ترقی تمہارے لیے ممکن ہے تو یہ ہو ہی نہیں سکتا کہ خدا تعالیٰ تمہارے قریب نہ آئے۔وہ یقیناً تمہارے لیے اپنے قُرب کے دروازے کھول دے گا اور تم محسوس کرو گے کہ وہ تمہارے قریب آ گیا ہے۔جیسے تمہارے کمرہ میں اگر آگ جل رہی ہو تو یہ ہو نہیں سکتا کہ تم اُس آگ کے وجود سے انکار کر سکو کیونکہ اُس کی گرمی تمہیں محسوس ہونے لگتی ہے۔اسی طرح اگر تم یقین رکھو کہ تمہارے لیے لا متناہی ترقیات کے دروازے کھلے ہیں اور تمہارا خدا بخیل نہیں تو یقیناً اُس کا قرب تمہیں محسوس ہی نہیں ہوگا بلکہ تم اپنی روحانی آنکھوں سے اُس کو دیکھنا شروع کر دو گے۔میرے اس جواب کا اُس پر ایسا اثر ہوا کہ وہ نماز کے بعد کئی گھنٹے تک مسجد میں بیٹھا رہا اور اس نے کہا مجھے اپنی ساری زندگی میں آج پہلی دفعہ یہ محسوس ہوا ہے کہ میرے لیے بھی ترقی کا راستہ کھلا ہے۔اور مجھے جو روحانی سرور اس سے حاصل ہوا ہے وہ پہلے کبھی حاصل نہیں ہوا۔اسی طرح تم بھی خدا تعالیٰ پر سچا ایمان پیدا کرو اور اُس کا ہاتھ پکڑنے کی کوشش کرو۔یہ مت خیال کرو کہ اُس کے تمام انعامات رسول کریم ﷺ پر ختم ہو گئے ہیں۔یا مسیح موعود پر ختم ہو گئے ہیں یا مجھ پر ختم ہو گئے ہیں۔اُس کے انعامات کے دروازے تم سب کے لیے کھلے ہیں۔اگر تم ان دروازوں میں داخل ہو کر اُس کے انعامات کو حاصل نہیں کرتے تو تم سے زیادہ بدقسمت اور کوئی نہیں۔لیکن اگر تم کوشش کرتے رہو اور اُس کے انعامات پر یقین رکھو تو تم وہی کچھ حاصل کر سکتے ہو جو سید عبد القادر صاحب جیلانی اور شبلی اور معین الدین صاحب چشتی نے حاصل کیا۔تمہارا خدا