بنیادی مسائل کے جوابات

بنیادی مسائل کے جوابات — Page 279

خادم سوال: ہالینڈ کے خدام کی 30 اگست 2020ء کی Virtual ملاقات میں ایک خادم نے حضور انور کی خدمت اقدس میں عرض کیا کہ ایک خادم کو کون سے کام کم از کم روزانہ کرنے چاہئیں؟ اس پر حضور انور نے فرمایا: جواب: ایک خادم کو کم از کم روزانہ پانچ نمازیں وقت پر پڑھ لینی چاہئیں۔فجر کی نماز فجر کے وقت اٹھ کے پڑھو اور اگر نماز سینٹر یا مسجد قریب ہے تو وہاں جاکے باجماعت پڑھو۔اور کام کے بعد مغرب اور عشاء کی نمازیں بھی نماز سینٹر میں پڑھیں۔اور کام پہ ظہر عصر کی نمازیں بھی پڑھیں۔اپنی پانچ نمازوں کی پابندی کر لیں کیونکہ یہ بنیادی حکم ہے۔یہ تو روزانہ کا کام ہے ، یہ کام کر لیں۔ٹکریں نہیں مارنی۔اس لئے نماز پڑھیں گے کہ اللہ تعالیٰ کا حکم ہے اور میں نے اس لئے نماز پڑھنی ہے تو پھر جو باقی اخلاق ہیں وہ بھی پیدا ہو جائیں گے۔جب آپ نماز پڑھتے ہوئے اللہ تعالیٰ سے اِهْدِنَا الصِّرَاطَ الْمُسْتَقِيمَ کی دعا کریں گے تو یہ دعا جب دل سے نکلے گی تو وہ یہ ہوگی کہ اللہ تعالیٰ آپ کو روحانی معاملہ میں بھی صراط مستقیم پر چلائے، صحیح گائیڈ کر تار ہے اور آپ صحیح رستہ سے ادھر اُدھر Deviate نہ کریں۔اور جو اخلاقیات اللہ تعالیٰ نے بتائے ہوئے ہیں، جو اللہ کی تعلیم ہے اس کے اوپر بھی صحیح چلتے رہیں۔اور جب إِيَّاكَ نَعْبُدُ وَإِيَّاكَ نَسْتَعِین کہیں گے تو ظاہر ہے کہیں گے کہ اے اللہ تعالیٰ ہم تیری ہی عبادت کرنا چاہتے ہیں اور تجھ سے ہی مدد مانگتے ہیں، ہماری مدد کر ، ہمیں ان لوگوں سے بچالے جن کو تُو نے سزا دی جو صحیح رستے سے پھر گئے۔تو اس کی رحمانیت مانگیں، اس کی رحیمیت مانگیں۔اور پھر جب سنجیدگی سے نماز پڑھ رہے ہوں گے تو صرف دنیا ہی کی باتیں نہ مانگیں، اگلے جہان کی بھی باتیں مانگیں۔ایک خادم جب سنجیدگی سے نماز پڑھ لے گا تو سمجھ لیں کہ اس نے سب کچھ کر لیا۔(قسط نمبر 12، الفضل انٹر نیشنل 2 اپریل 2021ء صفحہ 11) 279