انوارالعلوم (جلد 12) — Page 204
۲۰۴ آئینی طور پر اپنے حقوق کا مطالبہ کرنے والے ہیں اور یہ وہ حق ہے جس سے کوئی شخص کسی کو محروم نہیں کر سکتا- اس کے علاوہ اور بہت سی باتیں ہیں جو میں اپنے اگلے خط میں ظاہر کروں گا- سردست میں اسی پر اکتفا کرتا ہوں اور امید رکھتا ہوں کہ آپ لوگ جلد سے جلد ان امور کے متعلق کوشش کریں گے اور ایسے سامان پیدا کر دیں گے کہ خدا تعالیٰ کے فضل سے ہماری کوششیں بار آور ہوں اور آپ لوگوں کو آزادی کا سانس لینا نصیب ہو اور آپ کے لیڈر پھر آپ لوگوں میں آ کر شامل ہوں اور آپ کی خدمت میں مشغول ہوں- والسلام خاکسار مرزا محمود احمد صدر آل انڈیا کشمیر کمیٹی نوٹ: (۱) جن صاحبان کو یہ خط پہنچے ان سے درخواست ہے کہ اس کے اثر کو وسیع کرنے کے لئے وہ اپنے دوسرے دوستوں اور واقفوں کے نام اور پتے جو دوسرے گاؤں کے ہوں میرے نام یا سیکرٹری کے نام بھجوا دیں تا کہ آئندہ خطوط اور بھی وسیع علاقوں میں پھیلائے جا سکیں- (۲) چونکہ میرا ارادہ ہے کہ میں باقاعدہ انگلستان کے لوگوں کو اور ہندوستان کے حکام کو ایک رسالہ کے ذریعہ سے حالات کشمیر سے واقف کرتا رہوں میں ممنون ہوں گا اگر اپنے علاقہ کے حالات سے اور حکام کے رویہ سے مجھے آپ لوگ اطلاع دیتے رہا کریں- واقعات بالکل سچے اور بیان حلفیہ ہونے چاہئیں- مرزا محمود احمد (تاریخ احمدیت جلد۶ ضمیمہ نمبر۱ صفحہ۱۲ تا ۱۶ مطبوعہ ۱۹۶۵ء)