انوارالعلوم (جلد 10) — Page 264
۲۶۴ مخالفوں کو مار دیا ہے- اس پر رسول صلی اللہ علیہ وسلم جو ابھی فرما چکے تھے کہ خاموش رہو اور کوئی جواب نہ دو کیونکہ مصلحت اسی میں تھی- بہت سے مسلمان زخمی تھے اور خطرہ تھا کہ کفار پھر لوٹ کر ان پرحملہ آور نہ ہوں، فرمانے لگے کہ جواب کیوں نہیں دیتے- کہو- اللہ اعلی و اجل- اللہ اعلی و اجل-۱۴؎ اللہ ہی عزت والا اور شان والا ہے- اللہ ہی عزت والا اور شان والا ہے- اب دیکھو کہ باوجود ایسے نازک موقع کے کہ بہت کثرت سے مسلمان زخمی پڑے تھے- اور بظاہر مسلمانوں کے شکست ہو گئی تھی- آپ نے خدا تعالیٰ کی توحید پر حرف آتے دیکھ کر خاموش رہنے کو پسند نہ کیا- حالانکہ اپنی موت کی خبر کی تردید نہ کرنے دی- اس وقت بولنے کا صرف یہی نتیجہ نظر آتا تھا کہ دشمن حملہ کر کے سب کو مار ڈالے- مگر جب آپ نے خدا تعالیٰ کی تحقیر سنی تو فوراً جواب دینے کا ارشاد فرمایا- رسول کریم صلی اللہ علیہ وسلم کے پیدا کردہ پھل تیسرا ثبوت آپ کی تقدیس کا وہ پھل ہیں جو آپ نے پیدا کئے اور اس کے لئے میں حضرت ابوبکرؓ- حضرت عمرؓ- حضرت عثمانؓ اور حضرت علیؓ کو پیش کرتا ہوں- متعصب سے متعصب عیسائی جو رسول کریم صلی اللہ علیہ وسلم پر ناپاک سے ناپاک حملے کرتے ہیں وہ بھی کہتے ہیں- ابوبکر اور عمر بہت اچھے انسان تھے- وجہ یہ کہ انہوں نے دنیا کے لئے اتنی قربانیاں کی ہیں کہ دشمن بھی ان کی قربانیوں کا اعتراف کرتے ہیں- مگر جب دشمن یہ مانتے ہیں کہ ابوبکرؓ اور عمرؓ بہت اعلیٰ انسان تھے- جنہوں نے دنیا کو بے شمار فوائد پہنچائے تو سوال یہ ہے کہ کیا ایسے مفید وجود جو نعوذ باللہ ایک ٹھگ اور عیاش نے پیدا کر دیئے- وہ شخص جس کی نظر دوسروں کے مال پر ہو- وہ کہاں ایسے انسان پیدا کر سکتا ہے- جو اپنا مال بھی خدا کی راہ میں لٹا دیں- ٹھگوں سے ٹھگ ہی پیدا ہوتے ہیں اور عیاشوں سے عیاش ہی بنتے ہیں- کبھی ٹھگوں سے نیک اور عیاشوں سے متقی نہیں بنائے جا سکتے- یہ کس طرح ہو سکتا تھا کہ یہ لوگ جن کے تقویٰ، جن کی دیانت، جن کے ایثار، جن کی سادگی اور جن کی قومی غمخواری کی تمام دنیا قائل اور مقر ہے رسول کریم صلی اللہ علیہ وسلم کی صحبت میں ہر وقت رہنے کے بعد اگر نعوذ باللہ یہ صفات آپ میں ان لوگوں سے ہزاروں گنے زیادہ نہیں پائی جاتی تھیں تو ان اعلیٰ درجہ کے اخلاق کے ظاہر کرنے والے ہوتے اور پھر یہ دعویٰ کرتے کہ یہ اخلاق ان کو رسول کریم صلی اللہ علیہ وسلم کے سمندر میں سے ایک قطرہ کے برابر ملے ہیں-