انوارالعلوم (جلد 10) — Page 216
۲۱۶ کہا تھا۔خشت اول چوں نہد معمار کج تا ثریا مے رود دیوار کج اگر معمار پہلی اینٹ ٹیڑھی رکھے تو ثریا تک دیوار ٹیڑھی ہی رہے گی۔جتنی اونچی دیوار کرتے جائیں اتنی ہی زیادہ ٹیڑھی ہوگی۔گو کالج میں داخل ہونے والے طالب علم ہیں اور نظام کے لحاظ سے ان کی ہستی ماتحت ہستی ہے لیکن نتائج کے لحاظ سے اس جامعہ کی کامیابی یا ناکامی میں ان کا بہت بڑا دخل ہے۔یہ تو ہم یقین رکھتے ہیں کہ خدا تعالی کے فضل سے سلسلہ کے کام ترقی کرتے جائیں گے مگر ان طلباء کا ان میں بہت بڑا دخل ہو گا۔اس لئے انہیں چاہئے کہ اپنے جوش اپنے اعمال اور اپنی قربانیوں سے ایسی بنیاد رکھیں کہ آئندہ جو عمارت تعمیر ہو اس کی دیواریں سیدھی ہوں، ان میں کجی نہ ہو۔ان کے سامنے ایک ہی مقصد اور ایک ہی غایت ہو اور وہ یہ کہ اسلام کا اعلا ء ہو۔اس جامعہ سے پڑھ کر نکلنے والے سارے کے سارے دین کی خدمت میں نہیں لگائے جا سکیں گے۔ان میں سے بعض ہی لگ سکیں گے۔لیکن ان میں سے ہر ایک اپنا یہ مقصد اور غایت قرار دے سکتا ہے کہ وہ جامعہ سے فارغ ہونے کے بعد اسلام کی اشاعت کے لئے کام کرے گا۔اس کے لئے ضروری نہیں کہ انسان مبلغ ہی ہو، پہلے بھی اسلام اسی طرح پھیلا تھا۔حضرت ابو بکرؓ حضرت عمرؓ نے اپنا کاروبار نہ چھوڑ دیا تھا۔وہ اپنے کام بھی کرتے اور ساتھ ہی اشاعت اسلام میں رسول کریم ﷺ کی مدد بھی کرتے تھے۔تو ہو سکتاہے کہ جامعہ کے بعض طلباء کو تبلیغ کے کام پر نہ لگایا جا سکے۔ان میں بطور مبلّغ تبلیغ کرنے کی قابلیت نہ ہو یا کوئی اور مجبوریاں ہوں۔ان تمام صورتوں کو مد نظر رکھتے ہوئے جامعہ کے طلباء کو ایک ہی مقصد اپنی زندگی کا قرار دینا چاہئے اور وہ تبلیغ اسلام ہے۔خواہ عمل کے کسی میدان میں جائیں ،کوئی کام کریں، اپنے حلقہ میں تبلیغ اسلام کو نہ بھولیں۔ہو سکتا ہے کہ اس طرح کام کرنے والوں میں سے کئی تبلیغ کے لئے زندگی وقف کرنے والوں میں سے بعض سے زیادہ عمده طور پر تبلیغ کا کام کریں۔پس ان کو ایک ہی مقصد اپنے سامنے رکھنا چاہئے اور وہ تبلیغ ِ اسلام ہے۔اور ان کا یہی موٹو ہونا چاہئے کہ ولتكن منكم امة يدعون إلى الخير ويأمرون بالمعروف وينهون عن المنکر واولئک ھم المفلحون اور وَ مَا كَانَ الْمُؤْمِنُوْنَ لِیَنْفِرُوْا كَآفَّةًؕ-فَلَوْ لَا نَفَرَ مِنْ كُلِّ فِرْقَةٍ مِّنْهُمْ طَآىٕفَةٌ لِّیَتَفَقَّهُوْا فِی الدِّیْنِ وَ لِیُنْذِرُوْا قَوْمَهُمْ اِذَا رَجَعُوْۤا اِلَیْهِمْ لَعَلَّهُمْ یَحْذَرُوْنَ